ТЭМҮҮЛЭЛТЭЙ ХӨДӨЛМӨРЧ МОНГОЛ ХҮН 1

САЙХАН МОНГОЛ МАЛЧИН ХҮНЭЭР БИ БАХАРХДАГ

Хаврын тэргүүн сарын шинэд хуучраагүй саяхны нар ээсэн тунгалаг сайхан өдөр Монгол Улсын "Гавьяат малчин" хэмээх нэр хүндтэй шагнал хүртээд буй Баруунбүрэн сумын "Мянган лант" хэмээх газар хаваржиж байгаа малчин Гаваагийн Нямсүрэн гуайнд саатан буулаа. Түүнийг 85 насныхаа босгон дээр ийнхүү улсын нэр хүндтэй шагналыг аймгаасаа анх удаа хүртсэнд аймгийн Засаг дарга хүндэтгэл үзүүлж,

Сэлэнгэ аймгийн "Хүндэт иргэн"-ний үнэмлэх, тэмдгийг нь хотонд нь очиж гардуулж өгсөн юм. Биднийг хаалган дээрээ угтсан гавьяат малчныг үнэндээ би таниагүй. Том охин нь бололтой, хөгшин удахгүй орж ирэх байх гэсэн шүү юм бодож суутал хөнгөн шингэн алхаатай, гүйж харайх шахсан, яриа хөөрөөтэй дал шахаж яваа болов уу гэмээр тэр буурлын ярианаас гавьяат маань өөрөө болоод явчих нь тэр. Ингээд бидний яриа инээд хөөртэй эхэллээ.

-Та их ануухан юмаа. Би таныг 80 гарсан хүн гэж бодсонгүй. Аль нутгийн хүн билээ? Хэдэн жил мал маллаж байна ?

-Эмээ нь 15 настайгаасаа мал маллаж эхэлсэн. Одоо 70 жил мал маллаж байна. 1957 онд аймагтаа байгуулагдсан "Өрнөх" нэгдэлд малчин болж, тэр жилдээ нэгдлийнхээ аварга малчин болсноор ажил, амьдралын гараа маань эхэлсэн түүхтэй. Малын буянаар одоог хүртэл өвчин зовлон ярьж явсангүй. Би унаган Сэлэнгэ аймгийн Баруунбүрэн сумынх.

Эцэг, өвгөдөөсөө өвөлжиж, хаваржиж, зусч байгаа өгөөжтэй, буянаа өгсөн газар нутаг минь шүү дээ. Манайх 300 гаруй хонь, 30 гаруй үхэр, 60 гаруй адуутай. Малаа цөөлсөөн. Нэг туслах малчин бий. Би сургуульд огт суугаагүй. Аав, ээж минь өндөр настай хүмүүс байсан болохоор сургуульд явуулах дургүй. Сургуульд явна, араас өргөдөл бичээд л аваад ирнэ.

Гэхдээ аав, ээж минь намайг өдий зэрэгтэй явуулах амьдралын нарийн ухааныг зааж өгсөн болохоор одоо болтол тэдэндээ талархаж явдаг. Би ном эрдэм заалгаагүй ч дөрвөн аргын тоогоо боддог, сонирхсон ном, сонингоо уншчихдаг, малаараа панз наймаа ч хийчихнэ. Ааваасаа эрт хагацсан. Аав бидэнд "Өдөр боол шиг яв, шөнө ноён шиг суу" гэж захидаг байсныг мартдаггүй.

Ээж минь 12 cap хүртэл цагаан нэхий дээл хөөргөж өмсчихөөд, жин тээдэг их эршүүд хүн байсан. Манайх тариа тарьдаг. Ээж надаар шар туулгана аа, би жаахан юм чинь шараа дийлэхгүй. Тэгэхээр ээж намайг сураар ороолгоно доо. Голдуу намайг их авч явна. Тэгж л хар багаасаа хар бор ажилд суралцсан. Эхээс наймуулаа байлаа, одоо 90 гарсан нэг ахтайгаа хоёулхнаа үлдлээ дээ.

-Таны мал маллах арга ухаан, нууц нь юунд байдаг юм бэ?

-Нууцлаад байх юу байхав дээ хүү минь. Хүн авхаалж самбаатай, гол нь сэтгэлтэй байвал болохгүй, бүтэхгүй ажил гэж байдаггүй юм. Малын ажил гэдэг зогсоо байхгүй ажил. Мал маллана гэдэг миний хувьд мэргэжил болсон болохоор хэдэн малынхаа төлөө л зүтгэдэг. Орхиод ийш тийш явахаар бол уйлна шүү дээ. Өвгөн маань Жамьяндорж гэж "Улсын сайн малчин" цолтой хүн байлаа Арваад жилийн өмнө бурхан болсон. Бид хоёр найман охин, хоёр хүүтэй.

Хэдэн хүүхдээ хүн болгох, малаа өсгөхөд хань маань их тусалсаан. Түүнийхээ халамж, хүчинд мөн ч олон шагнал, урамшил хүртэж явлаа. Хөдөлмөрийн баатарт гурван ч удаа тодорхойлж байсан. Хүүхдүүд маань ч надад тусална. Хичээл номтой ч гэсэн амралтаараа хонио хариулна, хашаа хороогоо зөөнө, малаа саах, цагаан идээ, ноос, ноолуур бэлтгэх гээд л. Сангийн аж ахуйд 10-аад жил эрлийз мал малласан. Эрлийз хонины хурга гэж улаан нүцгэн юм гарна.

Мал маллах их нарийн. Орон дээрээ хүртэл тавиад, яг л хүүхэд шиг асардаг. Дандаа зуугаас дээш төл бойжуулж явлаа. Ноос, үс бүхий л зүйлийг нь дээд үзүүлэлтээр нь үзүүлж байлаа. АИХ-ын депутат хүртэл болж явлаа. Алдар нэр хүртэхээр нойр хүрдэггүй юм шүү дээ. Улам л хичээж, мэрийж ажиллах хэрэгтэй болдог. Малдаа тарга хүч авахуулахын тулд 10 cap хүртэл отор нүүдэл хийж, үхэр тэргэтэй, хэдэн хүүхдээ амбаартаа осгоочихгүй л явж байлаа даа.

Залуу байхад ядарч зүдрэхийг мэдэхгүй нэгийг хоёр болгочих юмсан гэж л зүтгэж явсан. Хүүхдүүд маань хичэл номдоо сайн сурдаг болохоор бүгд дээд боловсрол эзэмшсэн. Хоёр их эмч, дөрвөн багш, инженер, мал зүйч, орчуулагч гээд эх орондоо хэрэгтэй, газар бүхэнд ажиллаж яваа. Эмээ нь хичээж, зүтгэснийх баатраас дутахгүй сайхан шагнал хүртсэндээ магнай тэнийж сууна аа.

-Танд шагнал хүртээснийг дуулаад юу бодогдов доо?

Ийм шагнал авна гэж зүүдлээгүй. Хотон дотор хонь хургалчихаад эх нь олддоггүй хайж явтал хүргэн маань ирээд таныг дарга дуудаж байна, аваад ир гэсэн гэлээ. Би завгүй байна аа гэтэл танд сайн малчны шагнал олгож байгаа бололтой гэхээр нь би явж чадахгүй ээ, авчирч өгнө биз гэсэн. Гэтэл хүү Төрийн ордонд гардуулах бололтой юмаа гэлээ. Тэгээд би гэртээ орж ирээд бодлоо.

Би ная гарсан хүн дахиад төрийнхөө ордонд орох нас бий бил үү гэж. Малаа хаяж явах хэцүү санагдаад уйллаа. Тэгээд явахаар шийдээд бостол хувцсаа олдоггүй ээ. Нүдний шил, малгайгаа ололгүй гарсан. Таксинд суугаад Дархан орлоо. Хүн гэж тамтаггүй, машин ховор. Цаг тулаад байдаг. Арай гэж машин олоод суутал түгжрээд их л сандруу явсан. Хүүхдүүд зарим нь шил тааруулж, зарим нь малгай худалдаж аваад яг ямар шагнал авах гээд байгаагаа ч мэдэхгүй.

Зарим маань за ээж минь "Бооёоодуулчих ваа" гэж цаашлуулаад л. Тэгээд төрийнхөө тэргүүнээс шагнал гардаж авч байхдаа "Эзэн хичээвэл заяа хичээнэ гэдэг үнэн юм даа, ариун цагаан хөдөлмөрийн минь буян" гэж бодож, их л баяртай байсан. Манай нутгийнхан их баярлаж байгаа. Эрт авах байсан юм гээд л, зарим нь нулимс унагасан. Хойноос минь олон гавьяат төрөөсэй гэж ерөөе дөө хэмээн хөөрөлдлөө.

Гавьяат малчин Г.Нямсүрэн гуайтай хамгийн сүүлд 30-аад жилийн өмнө "Сүхбаатарын туг" сонины сурвалжлагч Ж.Буянхишиг гэдэг хүн уулзаж, "Бүрэнхааны хоньчин бүсгүй" гэдэг нийтлэл бичиж, олны хүртээл болгож байсныг мартдаггүй гэнэ. Түүнтэй тэр болгон сэтгүүлч, сурвалжлагчид уулздаггүй байсан нь сэтгүүлчид бидэнд бас нэгийг бодогдуулна.

Бүрэнхааны залуухан хоньчин бүсгүй өнөөдөр азай буурал болчихсон гавьяатын цолоо энгэртээ зүүчихээд үр хүүхэд, ач зээ нараа тойруулан жаргаж сууна аа. Бас ч болоогүй аймгийн Засаг даргын хэлснээр биднийг очиход сумынхаа Засаг дарга, Хурлын дарга хоёроор тогоогоо бариулсан шиг ээ сууна лээ. Баруунбүрэн сумын Засаг дарга Ж.Наранцэцэг Нямсүрэн гуайн тав дахь охин юм байна.

Сумын Хурлын дарга бүсгүй Ж.Наранцэцэг даргын багш хийж явах үеийн ууган шавь нарын нэг гэнэ. МУ-ын "Гавьяат малчин",Сэлэнгэ аймгийн 80-аад оны "Соёлч өрх"-ийн эзэгтэй, аймгийн "2000 оны манлай ээж" Г.Нямсүрэн гуай морь уядаг, сайхан дуулдаг, бас шанз, хуучир тоглочихдог ардын авьяастан цолтой элдэвтэй нэгэн юм. Түүний "Зүдрэх үедээ зүдэрч байсан ч шантраагүй, малын өгөөж их, хөлсөө гаргаж хийсэн бүхэн амттай байдаг юм шүү" хэмээн ярьсан нь чихэнд сонсогдсоор. Хүн амьдарсан шиг амьдарна гэдэг үнэхээр бахархалтай юм аа.

Р.Бумдарь

Эх сурвалж: “Сэлэнгийн мэдээ”

Зорилго

Бидний зорилго юу вэ?

Бидний Зорилго дотор маань бий. Тэрхүү Зорилгодоо хүрэхийн тулд сэтгэл зүрхний амьдралын замыг дагах хэрэгтэй. Сэтгэл зүрхний амьдралд хамгаас хэрэгтэй юм гэвэл ухамсар. Түүнгүйгээр юу ч байлаа шимгүй цөл адил. Харанхуй газар яваад орчихвол хаашаа явж байгаагаа мэдэхийн тулд бид гэрэл гаргадаг. Хэрэв харанхуй амьдралынхаа тухай мэдэхийг хүсвэл ухамсраасаа тус дэм хүртэнэ.

Хүний гадаад амьдрал болон гадаад ертөнцөд гаргасан амжилт нь маш хязгаарлагдмал билээ. Гэвч тэрээр өр зүрхнийхээ гүнийн гүнээ нэвтрэн орвол өөрийгөө ямагт өргөжүүлэн тэлэхийг эрмэлзэгч нэгэн зүйлийг мэдрэх болно. Тэр зүйл бол ухамсар юм. Ухамсар нь хүнийг Оройндээдтэй холбож өгдөг.
Ухамсар өөрөө Гэрэл агаад Хүч билээ. Гэрэл учраас өөрийгөө тэрээр дотоод ертөнцийн цэвэр ариун урамшил, гүн гүнзгий тэмүүлэлтэй зүйрцүүлэн адилтгадаг. Хүч учраас өөрийгөө тэрээр гадаад ертөнцийн түнэр харанхуйн хүлээс аргамж, балмад түрэмгий мунхгийг номхруулан дарах бурханлаг засаглалтай зүйрцүүлэн адилтгадаг.

Одоохондоо туйлын зорилго алсын алсад байгаа боловч няцаж шантарч болохгүй. Алхам алхмаар хэлбэрэлтгүй урагшлан явсаар та Зорилгодоо хүрнэ. Бид цэцэрлэгээс бага сургуульд дараа нь ахлах сургуульд тэгээд их сургуульд элсэж ордог шүү дээ. Тиймээс сэтгэл түвдэж, адгах хэрэггүй. Таны хувьд сонгосон Цаг хэзээ тохиохыг зөвхөн Бурхан л мэднэ. Тэмүүлнэ гэдэг бол таны гүйцэтгэх ёстой үүрэг. Цаглашгүй Нигүүлслээрээ ивээнэ гэдэг Бурханы хэрэг. Та хүлээсэн үүргээ гүйцэтгэсэн цагт Бурхан бээр Өөрийнхөө үүргийг гүйцэтгэж, Өөрийнхөө сонгосон Цагт таныг гэгээрэлд хүргэнэ. Тэгэхээр бүгдээрээ бодит байдалд түшиглэн урагшилцгаая. Дотоод тэмүүллийн маань үрээр, Зорилго маань өөрөө бидэнд хүрч ирнэ.
Өөрсдийгөө бид Дээдгэгээнд түүнчлэн Бурханы гэгээрэлд хүрэх эгнэшгүй зорилгодоо зориулах тэр л цагаас амьдрал маань өөрийгөө Үнэний айлдвар зарлиг, Хязгааргүй, Мөнх, Үхэлгүйн айлдвар зарлиг мөн гэдгээ бидэнд харуулна.

SriChinmoy

Диваажин Ба Там

Диваажин ба тамын тухай тайлбарлан хэлж өгнө үү?

Дотоод ертөнцийн хамгийн өндрөөс үзвэл там ч тэр, Диваажин ч тэр ухамсрын ертөнц болохыг бид ухаарна. Диваажин, там хоёулаа ухаан бодолд байдаг. Диваажин, тамын аль аль нь бидний дотоод гүнд буй ухамсрын төлөв байдал юм.

Үхлийн дараа хүн Бурхантай уулздаг бөгөөд хэрэв зөв сайн амьдарсан бол Диваажинд очно гэж Өрнөдийн зарим нэг шашинд сургадаг. Үүний тухай тайлбарлан хэлж өгнө үү?
Диваажин ба Бурхан гэдэг нь өндөр дээр, алсын алсад байдаг бус бид бүгдийн дотоод гүнд, өр зүрхний маань дотор бий. Диваажин бол ургамал мод жигдэрсэн, байшин барилгатай холын нэгэн орон бус бидний дотор буй ухамсрын ертөнц юм. Мөнхийн Диваажин нь тэмүүлэлт зүрхнийх нь гүнд байдгийг мөнхийн Үнэний эрэлчид ухаардаг. Хором бүхэнд дотроо бид Диваажинг юмуу тамыг бүтээж байдаг. Өргөжин тэлэх чанартай, сэтгэлийг хангагч бурханлаг бодол бодохдоо бид дотроо Диваажинг бүтээж, бурхангүй харанхуй, ариун бус муу муухай бодол бодохдоо бид дотроо буй тамын ертөнцөд хөл тавьдаг.

Диваажин гэдэг нь гэрэл гэгээтэй, баяр баясгалантай, үхэлгүй мөнх оршин амьдрахын тухай ойлголт. Гэхдээ бидэнд байгаа зүйлсээс юу нь үхэлгүй мөнх вэ гэдгийг ухаарах хэрэгтэй. Үхэлгүй мөнх зүйл гэвэл тэмүүлэгч ухамсар юм.

Srichinmoy.org

АУМ ТАРНИ

Аумын утга учир юу вэ?

Аум бол онцгой утга учиртай, бүтээгч хүчийг өөртөө агуулсан үе юм. Аум бол тарни бүгдийн эх тарни. Аум тарнийг давтан дуудахдаа бид дээрээс амар амгалан, гэрэл гэгээг буулган авчрахын зэрэгцээ дотоод хийгээд гадаад ертөнцдөө орчлон дахины эв эеийг цогцлоон бүтээдэг юм. Аум тарнийг давтан дуудахад дотоод болон гадаад ахуй биес маань бурханлаг ухаарал, тэмүүллээр тэтгэгдэж урамшдаг. Аум бол юутай ч эгнэшгүй агаад түүнд хязгааргүй хүч агуулагдана. Зөвхөн Аумыг давтан дуудсаныхаа үрээр Бурханы гэгээрэлд хүрэх боломжтой. Аумыг дуудаж байхдаа өөрийн тань дотор Бурхан дээшилж, доошилж хөдөлж байгааг мэдрэхийг хичээгээрэй. Олон зуун Энэтхэг эрэлчид зөвхөн Аумыг давтан дуудсаныхаа үрээр Бурханы гэгээрэлд хүрсэн билээ. Аум бол Бүтээгч Бурханы бэлгэ тэмдэг.

Аумыг давтаж дуудахдаа чухам юу болж байгааг анзаарч мэдэхийг хичээгээрэй. Муур, нохой, сармагчингийн нэрийг тэр бүү хэл жирийн нэг хүний нэрийг дуудлаа гэхэд та ямар ч урмыг бадраах зүйл мэдрэхгүй. Харин Бүтээгчийн бэлгэ тэмдэг, амь амьсгал нь болсон Аумыг дуудах даруйд зөн билгийг тань улам хурцалж, хорвоогийн амьдралыг тань бүрэн дүүрэн болгож хувиргах эрдэмтэй дотоод болон гадаад эрч хүчийг урамшуулан сэргээж буй дотоод мэдрэмжийг та мэдрэх болно. Энэ бол Аумын нууц. Хэрэв та хамаг амьдралынхаа туршид нэгэн нууцыг нандигнан дээдлэхийг хүсч байгаа бол дээдлэх учиртай нууц тань энэ юм. Аумыг давтан дууд, тэгвэл юм бүхэн таных болох болно.

Аумыг хэрхэн дуудах вэ?

Аум бол эгнэшгүй анир дуун. Бид ихэнхдээ хоёр зүйл харшин цохилдсоноос үүдэх дуу чимээг сонсдог. Харин Аумд тийм цохилт хэрэггүй. Аум бол анахада буюу цохилт үгүй, анир үгүй анир. Йог юмуу сэтгэл зүрхний Багш хүн өр зүрхний гүнийн гүнээ өөрөө үүдэн гарах Аумыг сонсох чадалтай байдаг.

Аумыг янз янзаар дуудаж болно. Хэрэв чангаар дуудвал Дээдгэгээний бүгдийг чадагч чанарыг мэдэрнэ. Зөөлөн дуудвал Дээдгэгээний баясгаланг мэдэрнэ. Аниргүй дуудвал Дээдгэгээний амгаланг мэдэрнэ. Дээдгэгээний үүдүүлсэн орчлон дахины Аум бол яндашгүй их далай билээ. Хүмүүний дуудсан бодгал Аум бол тэрхүү их далайд агуулагдах нэгэн дусал боловч их далайгаас ангид үл оршиж, их далайг өөрийн гэж үзэх чадалтай. Аумыг чангаар дуудаж буй хүн оройн дээд Дууны сансрын анир цуурайнд хүрч, түүнийг илрүүлэн гаргадаг юм.

Аумыг, гарсан анир нь чихэнд чичирхийлэн сонстож, хамаг биеэр түгэн тархаж байхаар тийм чанга дуудвал нэн сайн. Ингэвэл ухаан санаанд тань итгэлтэй байдал төрж, баяр хөөр, амжилт бүтээлийг та мэдрэх болно. Чангаар дуудахдаа “М” авиаг “Ау” авианаас наанадаж гэхэд гурав дахин урт байхаар дуудах нь зүйтэй.

Шричинмой.орг

ЦАГААН ХООЛТОН БАЙХ БУЯНТ ЁС ЗҮЙ

Ёс зүйн ариун чанарыг олоход махан бус хоол мэдэгдэхүйц нэмэртэй байдаг. сэтгэл зүрхний амьдралд ариун чанар хамгаас чухал байр сууринд тавигддаг. Бие, тамир, ухаанаа бид ариусгах ёстой. Мах, загас зэргийг идэхэд тэдгээр амьтны түрэмгийн чанар дотогш нэвтрэн орж, мэдрэлийн судлууд цочирч бид өөрийн эрхгүй түрэмгий, тогтворгүй болж хувирдаг. Дотоод болон гадаад амьдралд энхрий зөөлөн, энгийн, ариун чанарыг бүрэлдүүлэхэд ургамал ногооны зөөлөн чанар маш их тустай. Мах идсэний шууд үр нөлөө нь тогтворгүй, түрэмгий, хөнөөлтэй үйлдэл бодол болон ухамсрын доройтлоор илэрдэг.

Мах идэхгүй бол хүч тамираа алдаж байна гэдэг тань үнэн үг биш. Энэ хорвоод махан хоол иддэггүй хүн олон сая бий. Гэсэн ч тэд бүгдээрээ хүчтэй, эрүүл байдаг. Өөрийн тань эрүүл мэндийн байдал тэднийхээс ондоо гэж та хэлэх байх л даа. Гэхдээ Бурханы бүтээлийн дотор дотоод хоол хүнс гэдэг нэгэн зүйл байдгийг би хэлмээр байна. Тэр нь юу вэ гэвэл Амгалан, Гэрэл, Жаргалан гэх мэт сэтгэлийг хангагч, бурханлаг чанарууд юм. Зөв тэмүүлж, зөв бясалгавал та энэхүү дотоод хоолоор бие махбодоо тэжээж чадна. Дотоод эрдэмд нэвтэрхий ийм хэмжээнд хүрэх хүртэл нэлээд хэдэн жил зарцуулагдах байх л даа. Гэвч тэр хүртэл дотоод гүндээ нэвтрэн орж, чухам юунаас эрч хүч авдаг болохоо олж харахыг хичээгээрэй. Махнаас хүч авдаг гэсэн бодолтой хүмүүс бий. Хэрэв тэд дотоод гүндээ нэвтэрч үзвэл махнаас хүч авдаг гэсэн бодлоороо хүчээ сэлбэж байгаа гэдгээ ухаарах болно.

SriChinmoy.org

Хатуужил гэж юу вэ?

Хатуужил гэдэг бурханлаг чанар. Харамсалтай нь бид тэрхүү бурханлаг чанарыг машид эрхэмлэн хүсэмжлэхийн зэрэгцээ мунхаглан сэтгэж үл хэрэгсэх ажээ.

Хатуужил гэж юу вэ? Хатуужил гэдэг Бурханы ижилгүй Хайр, хариу нэхээгүй Жолоодлогын дотоод итгэмжлэл юм. Хатуужил гэдэг амьдралын догшин шуургыг тэсвэрлэн давахын тул бидний дотор нуугдсан Бурханы Хүч юм.

Цаг хугацаа гэдэг цойлон нисэх шувуу юм. Тэрхүү шувууг тогтоон барьж эзэмдэхийг та хүснэ үү? Өр зүрхнийхээ гүнээ хатуужлын модыг хэрхэн ургуулахын нууц эрдэмд суралцах аваас хамгийн эрхэм мөрөөдөл бүхэн тань үр өгөөжит бодит үнэн болон хувирах болно.

Хатуужил гэдэг Бурханы Тааллын өмнө өөрийгөө огоорох чин сэтгэлийн огоорол юм. Энэхүү огоорол нь мэдээжээр эдүгээ таны хэн буйг илэрхийлэх эгэл “би”-г тань оргүй болгоно гэсэн үг бус харин хязгаарт ахуйг тань хэтийдэн давж хязгааргүй “Би” болгон хувиргахуй билээ.

Хатуужлын эрдмийг гаднаас хүчлэн оноож болдоггүй юм. Хатуужил гэдэг бол таны дотоод баялаг, цэцэн билиг, амар амгалан, агуу ялалт юм.
Хатуужил тэвчээр маань хэзээ ч “энэ бол бүтэхгүй хэрэг” гэх мэтээр бидний зоригийг мохоох үг хэлэхгүй. Эсвэл бид бэлэн биш байна, эсвэл цаг нь болоогүй байна гэдгийг л тэр хэлдэг. Өөрсдийгөө бид бэлэн болсон гэж үзэж магадгүй боловч хамаг орших ахуй тэр чигээрээ бэлэн болох учиртайг ухаарах хэрэгтэй.

Хатуужил тэвчээртэй байна гэдэг нь идэвхгүй, хөдөлгөөнгүй байхын нэр биш. Энэ бол эрчтэй, хурдтай чанар. Хатуужил тэвчээрээр бид дотоод хүч чадлаа нэмэгдүүлдэг. Шийдмэг зориг бий бол хатуужил тэвчээрийг олж авахад түвэггүй гэдэг нь үнэн. Түүнчлэн хэрэв бидэнд хатуужил тэвчээр бий бол дотоод шийдмэг зориг маань ч бас хөгжих болно.

srichinmoy

Монгол хүний эрхэмлэх ёсон

Эрхэм зургаан зүйл:

1.    Үнэн бат журмыг үргэлж хичээж байх

2.    Өвөг дээдсийн сургаалыг санаж сэрж явах

3.    Үйлийн дээд ачийг буцааж хариулж явах

4.    Өгөх гээхийн хорвоог учирлан таниулж явах

5.    Үргэлж мэргэн номыг тогтоон тунгааж явах

6.    Үгээгүй дорд ардыг өргөн тэнхрүүлж явах

Монгол айлын дөрвөн чухал ёс:

1.    Эцэг эх асралтай

2.    Эх энэрэлтэй

3.    Дүү бишрэлтэй

4.    Хүү тахимдуу

Эхнэр нөхрийн эрхэм үүрэг:

Гадаах ажлыг эр нь мэднэ

Гарах орохыг эм нь мэднэ

Саадаг нумыг эр нь мэднэ

Сааль савыг эм нь мэднэ

Аян жинг аав нь мэднэ

Ааль аашийг ээж нь мэднэ

Ардаг догшныг аав нь мэднэ

Авах гээхийг ээж нь мэднэ

Эцэг хүний таван эрдэм:

1.    Уужим ухаан

2.    Хатан зориг

3.    Бат журам

4.    Өрх гэрийн түшиг

5.    Үр хүүхдийн сүр сүлд

Эцэг хүний цээрлэх найман зүйл:

1.    Бор дарсанд үл шунах 

2.    Болчимгүй үгэнд үл автах

3.    Болох болохгүй хэргийг сэдэх

4.    Богд Чингисийн сургаалд үл тэрслэх

5.    Үр хүүхдээ үл хараах

6.    Үнэн ханийг үл гомдоох

7.    Үйлийн хэцүүгээс үл шантрах

8.    Өмсөхийн өнгөнд үл автах

Эх хүний есөн эрдэм:

1.    Өнгөнд цэвэр

2.    Үйлэнд уран

3.    Үрд энэрэлтэй

4.    Үргэлж цэмцгэр

5.    Ханьдаа түшигтэй

6.    Хадамдаа элэгтэй

7.    Найранд дуутай

8.    Настанд ерөөлтэй

9.    Нартад буянтай

Эхнэр хүний цээрлэх таван гэм:

1.    Эр бусдыг сэтгэх

2.    Атаа жөтөө өвөрлөх

3.    Муу санаа агуулах

4.    Харамч байх

5.    Зохилдохгүй үйл үйлдэх

Эрхэм сайн хөвгүүний ёсон:

Эцгийн сургаалаар явагч, эрдэм сурахад дуртай, энэрэх ухаантай хөвгүүн лүгээ нэг, ах дүүгийн хэнд ч аятай, алинд ч зарсан ялгуун сайн, ааль зан нь дөлгөөн, номхон, уургүй, шударга хөвгүүн лүгээ хоёр, алиа наадамгүйгээр үл явагч, арга санаанд цэцэн сайн, аж төрөхөд маш зүтгэлтэй, ашид бүтэмжтэй хүү лүгээ гурав болно.

Асар муу хөвгүүний шинж:

Эцгийн сургаалыг үл сонсогч, тэнэг бөгөөд хэдэр, эд малаа нуун худалдагч эгэл муу хүү лүгээ хоёр, алиа болоод эрх танхи, ахас ихэсийг хараагч, алинд ч зарваас ойшоон үл хөдлөх адгийн муу хүү лүгээ хоёр, аяган дахь идээгээ чамлан айлын идээнд гүйгч, алив хов үгсийг зөөгч асар муу хөвгүүн лүгээ гурав болно.

Эрхэм сайн охины шинж:

Сайхан гоо зүстэй, санаа сэтгBkyэл номхон дөлгөөн, саруул ухаантай, эхийн сургаалаар явагч, эгч дүүтэйгээ эвтэй, эсгэх оёход уран, алиа наадгайд дургүй, ахуй биеэ хичээн хадгалаад, ахас ихэсийг зэргээр хүндлэгч, уур хилэнгүй.

Асар муу охины шинж:

Авир дүр нь чөтгөр мэт, ааш зан нь сармагчин мэт, асар их ууртай охин муу, ачит эцэг эхээ сургахад уурлан, ах дүүтэйгээ хэрэлдэн хараагч, алиа наадгайд маш баясан, айл хэсэгч охин муу, үйл хийхэд дургүй, үг хов хэлэх дуртай, үргэлжид гэрт гадаа яншигч дуулагч, үл бүтэх, айх ичихийг үл мэдэн, ажиггүй шалиг үг хэлэлцэн, аливаа садар самуун явдалтай, аальгүй.

Хүүхэд хүмүүжүүлэх ёсон:

Хэтэрхий амттанаар хангалуун байлгавал хэнэггүй шогломтгой болгоно

Хэтэрхий өнгө үзэмжид дасгаж сургавал ганган хээнцрээс өөр юмгүй болно

Хар багаас нь тансаг эд юманд умбуулбал эдийн шуналтай бэлэнчлэх болно

Хэрүүл зодоон улай үзүүлэхийг цээрлэ

Нойронд автуулахаас болгоомжилж эрт босохыг хичээдэг болго

Уурлаж уцаарлахыг цээрлэж уужуу тайванд сурга

Залхуу хойргыг цээрлэж ажилсаг зүтгэлийг сурга

Заваан бохирыг цээрлэж цэвэр цэмцгэрийг сурга

Хов зөөх, илүү үг ярихыг цээрлэж үнэнч ариуныг эрхэмлэ

Хувиа хичээхийг цээрлэж тусархаг нөхөрлөлийг сурга

Их идэхийг цээрлэж цагтай хэмжээтэй идэхийг сурга

Ашигч шунахайг цээрлэн амарлингуй өглөгчид сурга

Аймхай хулчгарыг цээрлэн эрмэг зоригт сурга

Хатуу хэрцгийг цээрлэн хайрлан энэрэхийг сурга

I LOVE YOGA